Tuesday, July 15, 2014

തിരിച്ചറിവ്

പിടിച്ചടക്കലിന്റെ മതങ്ങള്‍ക്ക്
കണ്ണുകളും കണ്ണാടികളും ഇല്ല...
ഉള്ളത് ദംഷ്ട്രകളും നഖങ്ങളും മാത്രം...

അതാകട്ടെ,
വിശുദ്ധ സംഹിതകളുടെ കവചമണിഞ്ഞ്
ഉമിനീരൊലിപ്പിച്ചും രക്തം തെറിപ്പിച്ചും
അങ്ങോട്ടും ഇങ്ങോട്ടും...

നരഭോജികളുടെ നാക്കില്‍
ഏച്ചുകെട്ടിയ വെറിയുടെ
മുഴച്ചു നില്പ്പ്
അതുവഴി പോയ പഴയ
വാഴ്ത്തപ്പെട്ട പ്രതിരൂപങ്ങളുടെയും
പ്രവാചകരുടേയും
കാല്പ്പാടുകള്‍ക്കപ്പുറത്തേക്ക് നീണ്ടു കിടക്കുന്നു..!!

ഇപ്പൊ ചരിത്രത്തിനു കാന്‍സര്‍ ബാധിച്ച്
മൂര്‍ദ്ധാവുവരെ എത്തി-
കൈക്കഴപ്പില്‍ വെട്ടിത്തീരാത്ത മുടികളും
കൊഴിഞ്ഞു തീരാറായി , തരിശായി...

എന്നിട്ടും ഇവിടെ,
മരിക്കാത്ത ചില ജഡങ്ങള്‍
പടര്‍ന്നും പാതി വിടര്‍ന്നും
കൊഴിഞ്ഞുപോയ ശ്വാസങ്ങളുടെ
മതം തിരയുന്നു...!!

*****

മതത്തിന്റെയും വിശ്വാസങ്ങളുടെയും പരിമിതികളില്ലാതെ പകകളും വേര്‍തിരിവുകളുമില്ലാതെ ലോകമില്ല എന്ന തിരിച്ചറിവില്‍ ഇനി ഒന്നേ പറയാനാവൂ - ഇന്നു ഞാന്‍.. നാളെ നീ..!!